RailEnquiry

मुंबई - रेल्वेचे ऑनलाइन आरक्षण रद्द केल्यानंतर प्रवाशांना तिकिटाचे पैसे मिळण्यासाठी बरेच दिवस जातात. हा विलंब टाळण्यासाठी मध्य रेल्वेने "ऍडव्हान्स कोचिंग रिफंड सिस्टिम' (एसीआरएस) सुरू केली. या प्रणालीचा प्रवाशांना फायदा होईल, असे सांगितले जाते. इंडियन रेल्वे केटरिंग अँड टुरिझम कॉर्पोरेशन लिमिटेडच्या (आयआरसीटीसी) सर्व्हरवरील ऑनलाइन आरक्षणाचा तपशील "एसीआरएस' यंत्रणेवर अपलोड होईल. सीएसटी येथील मध्य रेल्वेच्या मुख्य वाणिज्य व्यवस्थापकाला तो "डेटा' उपलब्ध होईल. त्यामुळे पैसे परत करण्याचे काम अधिक जलद होईल, असे मध्य रेल्वेने सांगितले.

प्रवाशाला तिकिटाचा परतावा मंजूर झाल्यानंतर "आयआरसीटीसी'ला ती रक्कम "पेऑर्डर'च्या स्वरूपात दिली जाते. ही प्रक्रिया "मॅन्युअली' होत असल्याने प्रवाशाच्या हातात पैसे मिळण्यासाठी एक महिना जातो. मात्र नव्या यंत्रणेमुळे आता तिकिटाचा परतावा प्रवाशांना 15 दिवसांत मिळू शकेल, असे सांगण्यात आले. ही प्रणाली कार्यान्वित झालेल्या काही मोजक्‍या रेल्वे यंत्रणांत मध्य रेल्वेचा समावेश झाला आहे.