RailEnquiry

मुंबई, दि. १९ (प्रतिनिधी) - मुंबईची ‘लाइफलाइन’ असणार्‍या मध्य, पश्‍चिम आणि हार्बर या तिन्ही रेल्वे मार्गार्ंवरून धावणार्‍या सर्व लोकल गाड्या आजपासून १२ डब्यांच्या झाल्या असून हळूहळू त्या १५ डब्यांच्या करण्यात येणार आहेत.
मुंबईच्या उपनगराचा झपाट्याने होणारा विकास आणि वाढत जाणारी रेल्वे प्रवाशांची संख्या लक्षात घेता रेल्वेच्या तिन्ही मार्गांवर धावणार्‍या ९ डब्यांच्या उपनगरीय रेल्वे गाड्या १२ डब्यांच्या करण्यात आल्या असल्याची माहिती मध्य रेल्वेचे मुख्य जनसंपर्क अधिकारी विद्याधर मालेगावकर यांनी दिली. मध्य आणि पश्‍चिम या दोन्ही मार्गावर ७८९ तसेच हार्बर मार्गावर धावणार्‍या २२८ सर्वच्या सर्व उपनगरीय गाड्या आजपासून १२ डब्यांच्या करण्यात आल्या. शेवटची ९ डबा गाडी दुपारी १२ वाजता धावली.
सीसीटीव्ही बसविणे अशक्य
महिलांची सुरक्षा आणि गैरप्रकार रोखण्यासाठी रेल्वेच्या सर्व स्थानकांवर सीसीटीव्ही बसविण्यात येत आहेत. परंतु लोकल्सच्या डब्यातून ते बसविणे निव्वळ अशक्य आहे, असे रेल्वे बोर्डातर्फे सांगण्यात आले. महिलांच्या सुरक्षेसाठी उपनगरी गाड्यांच्या महिलांच्या डब्यांच्या जवळच्या डब्यात आरपीएफचे जवान तैनात करण्यात येत आहेत. तसेच महिलांच्या डब्यात महिला पोलीस कॉन्स्टेबल उपलब्ध करून देण्यात येतील, असेही रेल्वे बोर्डातर्फे स्पष्ट करण्यात आले. सर्व डब्यांतून सीसीटीव्ही बसविणे फार खर्चिक आहे, असेही सांगण्यात आले.
- सावंतवाडी टर्मिनस नाही
कोकण रेल्वेमार्गावर सावंतवाडी टर्मिनस तयार करण्याचा कोणताही प्रस्ताव नाही, असे रेल्वे बोर्डाचे सदस्य ए. पी. मिश्रा यांनी आज स्पष्ट केले. त्याचप्रमाणे कोकण रेल्वे सध्या डबघाईला असून जेमतेम दोन-तीन कोटींच्या नफ्यात असल्याने अन्य मार्गांना प्राधान्य देण्यात येत असल्याचे त्यांनी सांगितले.
- कोकण रेल्वेचे विद्युतीकरण प्रस्ताव इतक्यात मंजूर होणे कठीण.
- कोकण रेल्वे मार्गावर बुलेट ट्रेनचा प्रकल्प खर्चिक. मात्र पुणे-अहमदाबाद बुलेट ट्रेनचा प्रस्ताव.
- चर्चगेट ते विरार एलिवेटेड रेल्वे होणार.
- माळशेज रेल्वेची मागणी नाही.