RailEnquiry

रेल्वे प्रवाशांच्या सुरक्षिततेसाठी मध्य रेल्वे विभागातील महत्त्वाच्या स्थानकांवर आणि लांब पल्ल्याच्या गाड्यांमध्ये सीसी टीव्ही बसवावेत , अशी मागणी चिंचवड प्रवासी संघाने केली आहे.

सोलापूरजवळ मुंबई-कोणार्क एक्स्प्रेसमध्ये सोमवारी प्रवाशांना मारहाण करून लुबाडण्याचा प्रयत्न झाल्याने प्रवाशांच्या सुरक्षिततेचा प्रश्न पुन्हा ऐरणीवर आला आहे. मागील महिन्यातील चिंचवड आणि दौंड स्थानकाजवळील घटना ताजी असतानाच , मुंबई-कोणार्क एक्स्प्रेसमधील लूटमारीमुळे प्रवाशांच्या सुरक्षेबाबत संघटनांनी पुन्हा आवाज उठविला आहे.

या संदर्भात चिंचवड प्रवासी संघटनेचे कार्याध्यक्ष गुलामअली भालदार , उपाध्यक्ष डॉ. गणेश अंबिके यांनी रेल्वेमंत्री मुकुल रॉय , उपमुख्यमंत्री अजित पवार , मध्यरेल्वेचे महाव्यवस्थापक राकेश सक्सेना , खासदार सुप्रिया सुळे यांना निवेदन दिले आहे. पुणे - सोलापूर रेल्वे मार्गावर जाणाऱ्या मेल , एक्स्प्रेस गाड्यांमध्ये प्रवाशांना लुबाडण्याच्या घटना मोठ्या प्रमाणावर होत आहेत. प्रामुख्याने दौंड ते कुर्डुवाडी सोलापूर दरम्यान एकेरी रेल्वेमार्ग असल्याने या घटना घडल्या आहेत. दीड महिन्यात तीन-चार प्रकार घडले आहेत. प्रवाशांच्या सुरक्षिततेसाठी रेल्वे प्रशासनाने तातडीने निर्णय घेणे आवश्यक आहे. मात्र , आतापर्यंतच्या घटना पाहता प्रशासनाने याबाबत अद्याप गांभीर्याने पावले उचललेली नाहीत. स्थानकावरील कायमस्वरूपी बंदोबस्ताबरोबरच सीसी टीव्ही कॅमेरे बसविणे आवश्यक आहे. रात्रीच्या वेळी सर्वच स्थानकांवर प्रखर दिव्यांचा पुरेसा प्रकाश आवश्यक आहे अशी मागणी निवेदनामध्ये करण्यात आली आहे.