RailEnquiry

नागपूर : रेल्वेतून प्रवासादरम्यान अज्ञात व्यक्तींनी दिलेले खाद्यपदार्थ खाऊ नका , असा संदेश देण्यासाठी शुक्रवारी आरपीएफ व लोहमार्ग पोलिसांनी नागपूर स्थानकावर काही गाड्यांमध्ये जादूचे प्रयोग करून जनजागृती केली.

गेल्या काही दिवसांपासून रेल्वेत प्रवाशांना खाद्य पदार्थांमधून गुंगीचे औषध देऊन लुटण्याच्या घटना वाढल्या आहेत. सहप्रवाशाने दिलेले पदार्थ खाऊ नये यासाठी रेल्वे प्रशासन तसेच पोलिसांतर्फे नेहमीच प्रवाशांना आवाहन करण्यात येते. मात्र , त्याने फारसा फरक पडलेला नाही. या विषयाकडे प्रवाशांना विशेषत्वाने आकर्षित करण्यासाठी नागपूर रेल्वे पोलिस फोर्स व लोहमार्ग पोलिस यांनी एका जादूगाराची मदत घेतली. पोलिस जादूगारालाच गाडीत घेऊन गेले आणि त्याचे प्रयोग प्रवासी लक्ष देऊन पाहू लागले. राजधानी आणि ए.पी. एक्स्प्रेसमधील प्रवाशांपुढे हे जादूचे प्रयोग झाले. जादूगाराने हवेत हात हलवून बिस्कीट , चॉकलेट , लाडू , पेढे , बिस्कीट , शीतपेयं असे पदार्थ हजर केले आणि प्रवाशांना खायला दिले. प्रवाशांनी कुठलीही शहानिशा न करता ते तोंडात टाकले. असे केल्यानेच लुटण्याच्या घटना घडत असतात. त्यामुळे जादूगार असो की अन्य कुणी , प्रवासादरम्यान कुणाशाही दाट मैत्री करू नका , त्याने दिलेले खाद्यपदार्थ खाऊ नका , असा संदेश या प्रयोगांमधून देण्यात आला. यावेळी आरपीएफचे पोलिस निरीक्षक के.डी. मोरे , उपनिरीक्षक हलदर , उपनिरीक्षक मिश्रा , लोहमार्गचे उपनिरीक्षक जागेश्वर डहाट , आरपीएफचे विकास शर्मा , विनोद राठोड , मलिक परते उपस्थित होते.