RailEnquiry

मुंबई


देशातील सर्व प्रकारच्या सार्वजनिक वाहतूक सेवेसाठी एकच एक स्मार्ट कार्ड तयार करण्याचा केंद्र सरकारच्या नगरविकास खात्याचा उपक्रम प्रत्यक्षात येण्याची शक्यता दुरावली आहे. त्यामुळेच या वर्षी सुरू होत असलेल्या मेट्रो आणि मोनो रेल्वेसाठी एकच स्मार्ट कार्ड तयार करण्याचा निर्णय एमएमआरडीएने घेतला आहे. त्यास बेस्टनेही हिरवा कंदीला दाखवला आहे.

सार्वजनिक वाहतुकीच्या साधनांचा वापर करणाऱ्या प्रवाशांना प्रत्येक वाहनासाठी स्वतंत्र तिकिटे काढणे वेळेखाऊ आणि त्रासदायक आहे. त्यामुळे या सर्व सेवांसाठी एक स्मार्ट कार्ड असावे यासाठी केंद्राने 'मोअर' कार्डाची घोषणा केली होती. मात्र बहुतांश ठिकाणी रेल्वे सेवांनी या कार्ड योजनेत सहभागी होण्यास असमर्थता दर्शवली होती. गेली दोन वर्षे या कार्डबाबत केवळ चर्चाच सुरू असून आता तर हा विषय प्राधान्यक्रमातही नाही. 'मोअर' कार्डाची योजना येण्यापूर्वी, मेट्रो, मोनो आणि बेस्टसाठी एकच स्मार्ट कार्ड तयार करण्याच्या तेव्हा बासनात ठेवलेल्या योजनेचे पुनरुज्जीवन करण्याचा निर्णय एमएमआरडीएने घेतला असल्याचे महानगर आयुक्त यूपीएस मदान यांनी स्पष्ट केले. या कार्डात रेल्वेचा समावेश होऊ शकतो, मात्र त्यांना रेल्वे बोर्डाकडून परवानगी घ्यावी लागेल. त्यात बराच वेळ जाऊ शकेल. त्यामुळे या सहभागाबाबत रेल्वे नंतर विचार करू शकेल. मेट्रो आणि मोनो या सेवा सुरू होत असल्याने एमएमआरडीए स्वतंत्रपणे स्मार्ट कार्ड तयार करण्याच्या प्रक्रियेस चालना देण्याचे ठरवले आहे, असेही मदान म्हणाले.