RailEnquiry

मध्य रेल्वेवर ' एटीव्हीएम ', ' जेटीबीएस ' चा वाढता वापर

हेमंत साटम

तिकीट खिडक्यांवर लागणाऱ्या लांबलचक, वेळखाऊ रांगांवर मध्य रेल्वेने शोधलेल्या तोडग्याला यश लाभले आहे. एटीव्हीएम, जेटीबीएस अशा सुविधांना दिलेल्या प्रोत्साहनामुळे यावर्षी तिकीट खिडक्यांवरील गर्दीत १० टक्क्यांनी घट झाली आहे.

मध्य रेल्वेवर तिकीट खिडक्यांवर तिकीट मिळण्यासाठी किमान १५ ते २० मिनिटांचा कालावधी लागतो. हा कालावधी कमी करण्यासाठी मध्य रेल्वेने अतिरिक्त ' एटीव्हीएम ' ( ऑटोमॅटिक तिकीट वेंडिंग मशिन) आणि ' जेटीबीएस ' ( जनसाधारण तिकीट बुकिंग सेवा) या सेवांना प्रोत्साहन देण्याचा निर्णय घेतला. त्यानुसार मध्य रेल्वेच्या स्टेशनांवर सध्या ३८५ एटीव्हीएम असून, जेटीबीएसची संख्या १६५पर्यंत गेली आहे. गेल्या काही महिन्यांमध्ये या स्थानकांवर १३० अतिरिक्त एटीव्हीएम मशिन बसवण्यात आल्या आहेत. प्रवाशांकडूनही या सुविधांचा वापर वाढत आहे. येत्या काळात तिकीट खिडक्यांवरील गर्दी आणखी कमी करण्यासाठी योजना आखल्या जात असून, भविष्यात एटीव्हीएमवरून २५ टक्क्यांपर्यंत तिकीट विक्री नेण्याचे उद्दीष्ट असल्याचे मध्य रेल्वेचे वरिष्ठ विभागीय व्यावसायिक व्यवस्थापक नरेंद्र पाटील यांनी सांगितले.

*मध्य रेल्वेवर दररोज सुमारे ९ लाख ५० हजार तिकिटांची विक्री

*३४ टक्के विक्री एटीव्हीएम व जेटीबीएसवर

*एटीव्हीएमचा वाटा १८ टक्के, तर जेटीबीएसचा १६ टक्के

*साडेपाच टक्के तिकीटविक्री कूपन व्हॅलिडेटिंग मशिनने

अजूनही तिकीट खिडक्यांना प्राधान्य

एटीव्हीएम, जेटीबीएस सुविधा असतानाही अजूनही तिकीट खिडक्यांनाच प्राधान्य देणाऱ्या प्रवाशांची संख्याही मोठी आहे. मध्य रेल्वेवर ४३१ तिकीट खिडक्या असून, त्यापैकी ३२० खिडक्या दररोज उपलब्ध असतात. या खिडक्यांवरील तिकिटांची खरेदी ६२ टक्के आहे.

' एटीव्हीएम ' वर कर्मचारी नियुक्तीचा फायदा

एटीव्हीएम कार्ड नसणाऱ्या प्रवाशांसाठी रेल्वेने प्रत्येक मशिनवर निवृत्त कर्मचारी नियुक्त केला आहे. तीन पाळ्यांमध्ये हजर असलेले हे कर्मचारी प्रवाशांना त्यांच्याजवळील कार्डवरून तिकीट काढून देतात. जुलैपूर्वी ​एटीव्हीएमवरील तिकीट विक्री १ लाख १० हजारांपर्यंत मर्यादित होती. ती संख्या १ लाख ६० हजारांवर गेली आहे. स्टेशन परिसरात खासगी स्तरावर तिकीट विक्रीचे केंद्र असणाऱ्या जेटीबीएसवर दररोज १ लाख तिकिटांची विक्री होत आहे. या केंद्रांची संख्याही वाढणार असल्याने प्रवाशांना रांगेत ताटकळत बसावे लागणार नसल्याचा दावा पाटील यांनी दावा केला.