RailEnquiry

ठाणे

प्रवाशांच्या तोबा गर्दीने तासभर घोळ

मध्य रेल्वेच्या ठाणे स्टेशनात बसवलेल्या एस्कलेटरचे (सरकता जिना) गुरुवारी उद्घाटन झाले खरे; पण ढिसाळ नियोजन, गोंधळ, आणि प्रचंड रेटारेटीत झालेल्या या कार्यक्रमानंतर अर्ध्या तासातच हा एस्कलेटर बंद पडला! या घटनेमुळे मॉलप्रमाणे रेल्वे स्टेशनमध्ये एस्कलेटर बसवण्याचा प्रयोग यशस्वी ठरणार का, याबाबत संभ्रम निर्माण झाला आहे.

ठाणे स्टेशनात प्लॅटफार्म क्रमांक ३ व ४ वर फूटओव्हर ब्रीजवर जाण्यासाठी एस्कलेटर बसवण्यात आले आहेत. उपनगरी स्टेशनातील हा पहिलाच प्रयोग असल्याने त्याच्या उद्घाटनासाठी प्रवासी मोठ्या संख्येने जमले होते. कार्यक्रमाची वेळ दुपारी सव्वा बाराची असताना पालकमंत्री गणेश नाईक एक तास विलंबाने आले. आधीच प्रचंड गर्दी, त्यात पावसाच्या सरींमध्ये गर्दी आवरताना पोलिसांच्या नाकी नऊ आले होते.

गणेश नाईक, विधान परिषदेचे उपसभापती वसंत डावखरे व खासदार संजीव नाईक दाखल झाल्यावर एस्कलेटरचे उद्घाटन झाले आणि त्यावरून जाण्यासाठी एकच गर्दी झाल्याने एस्कलेटर अर्ध्यावरच थांबवण्यात आले. कॅमेरामन त्यावरून चालत फूटओव्हर ब्रीजवर गेल्यानंतर एस्कलेटरने व्हीआयपींना वर नेण्यात आले. त्यानंतर मात्र प्रवाशांना कोणीही रोखू शकले नाही. एस्कलेटरवर तोबा गर्दी उसळली आणि अर्ध्या तासातच ते बंद पडले. बराच वेळ ते चालू होत नसल्याने रेल्वे अधिकारी घामाघूम झाले होते. अखेर तासाभराच्या प्रयत्नानंतर एस्कलेटर पुन्हा सुरू करण्यात यश आले.

दुसरा एस्कलेटर दीड महिन्यात

रेल्वेचे विभागीय व्यवस्थापक मुकेश निगम यांनी केलेल्या भाषणात एस्कलेटरचे उद्घाटन हा ऐतिहासिक क्षण असल्याचे सांगत, येत्या दीड महिन्यात दुसरा एस्कलेटर सुरू केला जाईल, असे स्पष्ट केले. प्रवाशांनी या सुविधेचा वापर काळजीपूर्वक करावा, असे कळकळीचे आवाहनही त्यांनी केले.

एस्कलेटर सक्षम आहे का? ठाणेकर प्रवाशांची भीती

गुरुवारी शुभारंभानंतर लगेचच ठाणे स्टेशनातील एस्कलेटर बंद पडल्याने अनेक प्रश्न उपस्थित झाले आहेत. ठाणे स्टेशनात दिवसभरात तब्बल ६ लाख ४० हजार प्रवाशांची येजा सुरू असते. घड्याळ्याच्या काट्यावर चालणाऱ्या चाकरमान्यांचा लोंढा जेव्हा एस्कलेटरवर येईल त्यावेळी ते पुरेसे ठरतील का याबाबत प्रश्नचिन्ह निर्माण झाले आहे. फूट ओव्हर ब्रीजवर उद्भवते तशी परिस्थिती एस्कलेटरवर निर्माण झाली तर काय होईल, अशी भीतीही प्रवासी संघटना व्यक्त करत आहेत.

ठाणे स्टेशनात एकूण १० प्लॅटफॉर्म आहेत. त्यापैकी १ ते ६ मेन लाईन उपनगरी गाड्यांसाठी, ५ ते ८ लांब पल्ल्याच्या गाड्यांसाठी आणि ९, १० क्रमांकाचे प्लॅटफॉर्म हार्बर मार्गासाठी वापरले जातात. त्यापैकी ३ ते ६ या एकूण चार प्लॅटफॉर्मवर फूट ओव्हर ब्रीजपर्यंत जाण्यासाठी एस्कलेटर बसवले जात आहेत. त्यापैकी पहिल्या टप्प्यात ३ व ४ प्लॅटफॉर्मवरील एस्कलेटरचे गुरुवारी उद्घाटन करण्यात आले. सकाळी ६ ते रात्री १० या वेळेत एस्कलेटर चालवले जातील.

एस्कलेटर बसवताना लोकप्रतिनिधींकडून मॉलमधील एस्कलेटरचा दाखला दिला जात होता. मॉलमध्येही दिवसाला हजारो लोक येतात, पण तेथील एस्कलेटर बंद पडत नाहीत. तसेच स्टेशनातील एस्कलेटरदेखील व्यवस्थित चालतील असा भाबडा समज या राजकीय नेत्यांचा आहे. पण मॉल आणि स्टेशन येथे होणाऱ्या गर्दीत प्रचंड फरक असल्याचे मुंबई रेल प्रवासी संघाचे अध्यक्ष मधू कोटीयन यांचे म्हणणे आहे. ठाण्यात गर्दीच्या वेळी ३ व ४ प्लॅटफॉर्मवर गाड्या आल्या की फूटओव्हर ब्रीज अपुरा पडतो, त्यावेळी एस्कलेटरची क्षमता अगदीच अपुरी ठरेल असे त्यांचे म्हणणे आहे. अशा परिस्थितीत मिनिटाला शंभर प्रवासी नेण्याची या एस्कलेटरची क्षमता तोकडी सिध्द होईल, असा दावा त्यांनी मटा प्रतिनिधीशी बोलताना केला.

ठाणे प्रवासी महासंघाचे पदाधिकारी नंदकुमार देशमुख यांनीही एस्कलेटरच्या क्षमतेबाबत प्रश्नचिन्ह उपस्थित केले. अनेकदा संध्याकाळी ठाण्यात फूट ओव्हर ब्रीजवर गर्दी नियंत्रित करण्यासाठी पोलिस नेमावे लागतात. एस्कलेटरवर अशी परिस्थिती ओढवली तर काय करणार, असा सवाल त्यांनी केला. दरम्यान पावसाच्या पाण्यापासून संरक्षण व्हावे यासाठी एस्कलेटरवर टाकलेली शेड अर्धवट आहे. शेडमुळेवरुन पाणी पडणार नसले तरी बाजूने मात्र पाण्याचा वर्षाव होईल. त्यामुळे एस्कलेटर नादुरुस्त होण्याची भीती त्यांनी व्यक्त केली.