RailEnquiry

म. टा. प्रतिनिधी , मुंबई

धावत्या चाकांवरील आलिशान डायनिंग हॉल , मखमली सोफासेट , आरामदायी आणि सुपरफास्ट प्रवास असलेली राजधानी एक्स्प्रेसच्या धर्तीवरील एक्स्प्रेस आता मध्य रेल्वेवरही धावणार आहे. विशेष म्हणजे कुर्ल्याच्या लोकमान्य टिळक टर्मिनसवरून (एलटीटी) सुटणारी ही एक्स्प्रेस व्हाया नाशिक दिल्लीपर्यंत धावणार आहे. त्यामुळे इगतपुरी , नाशिक , मनमाडच्या प्रवाशांना ' दिल्ली दूर नही ' चा अनुभव मिळेल.

मध्य रेल्वेवरूनही दिल्लीसाठी सुपरफास्ट एक्स्प्रेस सोडण्याचा प्रस्ताव मध्यंतरी रेल्वे बोर्डाला धाडण्यात आला होता. तो आता मान्य झाला असल्याने पश्चिम रेल्वेप्रमाणेच या मार्गावरूनही ' राजधानी ' ला पर्याय उपलब्ध झाला आहे. एक्स्प्रेसमधील सुविधा ' राजधानी ' सारख्याच असतील. मात्र याचे तिकीट सुपरफास्ट दर्जाच्या गाडीचे असतील. ही ट्रेन ' एलटीटी ' वरून सुटल्यानंतर कल्याण , इगतपुरी , नाशिक , मनमाड या स्टेशनांवरच थांबणार असून त्यानंतर कुठेही प्रवाशांना प्रवेश मिळणार नाही. त्याचप्रमाणे दिल्लीहून परतीसाठी निघाल्यानंतर थेट मनमाडला थांबेल. त्यानंतर नाशिक , इगतपुरी , कल्याण , कुर्ला येथेच प्रवासी उतरू शकतील.

मुंबई-दिल्ली

कुर्लाः दुपारी १.३०

कल्याणः दु. २.२५

नाशिकः सायं. ४.५०

मनमाडः सायं. ५.३०

दिल्लीः सकाळी ९.३०

दिल्ली-मुंबई

निजामुद्दिनः दुपारी १.३०

मनमाडः दुसऱ्या दिवशी सकाळी ५.३०

नाशिकः स. ६.३०

इगतपुरीः स. ७.३०

कुर्लाः स. ९.३०

जनरल डबेही वाढवणार

अनेक एक्स्प्रेसचे डबे १८वरून २१ किंवा २४पर्यंत वाढले आहेत. मात्र , त्यात जनरल डब्यांची संख्या वाढवली जात नसल्याची तक्रार मांडली जाते. त्यासाठी येत्या काळात जनरल डब्यांची संख्याही वाढवण्यात येणार असल्याचे रेल्वे बोर्डाचे सदस्य ए.पी. मिश्रा यांनी स्पष्ट केले आहे.

रेल्वे बजेटमध्ये घोषणा

येत्या रेल्वे बजेटमध्ये या गाडीचा समावेश होणार असून लवकरच ही सेवा ग्राहकांसाठी उपलब्ध होईल.

- सुबोधकुमार जैन , जनरल मॅनेजर , मध्य रेल्वे