RailEnquiry

मुंबई

ठाणे यार्ड रिमॉडेलिंगसाठीच्या जम्बो मेगाब्लॉकमुळे उडालेल्या प्रचंड गोंधळानंतर धास्तावलेल्या मध्य रेल्वेने आता सावधगिरीचा ट्रॅक पकडला आहे. उद्या , रविवारी मध्य , पश्चिम आणि हार्बर अशा तिन्ही मार्गांवर सकाळी ११ ते दुपारी ४ वाजेपर्यंत मेगाब्लॉक चालणार असून , या काळात प्रवाशांनी जोखीम पत्करू नये , गर्दीने तुडुंब भरलेल्या गाड्यांमध्ये प्रवास करू नये , अशी स्पष्ट सूचना रेल्वेने केली आहे.

मध्य रेल्वेः अप स्लो मार्गावर मुलुंड आणि माटुंगापर्यंत सकाळी ११.३० ते दुपारी ३.३० वाजेपर्यंत मेगाब्लॉक चालेल. या काळात ठाण्यावरून सुटणाऱ्या अप स्लो मार्गावरील लोकल मुलुंड आणि माटुंगादरम्यान अप फास्ट मार्गावर धावतील आणि मुलुंड , भांडुप , विक्रोळी , घाटकोपर , कुर्ला स्टेशनवर थांबतील. या लोकल नाहूर , कांजूरमार्ग , विद्याविहार स्टेशनवर थांबणार नाहीत. मेगाब्लॉक काळात या स्टेशनच्या प्रवाशांना डाऊन मार्गावरून प्रवास करता येईल.

हार्बर रेल्वेः अप आणि डाऊन मार्गावर मानखुर्द आणि नेरूळ स्टेशनांदरम्यान सकाळी ११ ते दुपारी ३ वाजेपर्यंत मेगाब्लॉक चालेल. या काळात सीएसटी ते पनवेल/बेलापूर/वाशी मार्गावरील लोकल सेवा सकाळी ११ ते दुपारी ३ वाजेपर्यंत रद्द करण्यात आल्या आहेत. प्रवाशांच्या सुविधेसाठी सीएसटी-मानखुर्द आणि पनवेल-ठाणे मार्गावर विशेष लोकल सोडण्यात येणार आहेत.

पश्चिम रेल्वेः मुंबई सेंट्रल आणि महालक्ष्मी स्टेशनपर्यंत सकाळी १०.३५ ते दुपारी ३.३५ या वेळेत डाऊन स्लो मार्गावर मेगाब्लॉक चालेल. या काळात या लोकल डाऊन फास्ट मार्गावर वळवण्यात येणार असून त्या महालक्ष्मी , एल्फिन्स्टन , माटुंगा स्टेशनवर थांबणार नाहीत. बारा डब्यांच्या लोकल लोअर परळ , माहीम , खार स्टेशनवर दोनदा थांबतील.

मेगाब्लॉकमुळे काही अप आणि डाऊन लोकल रद्द करण्यात आल्या असून स्लो आणि फास्ट लोकल नियमित वेळेपेक्षा १५ मिनिटे उशिरा धावतील. त्यामुळे गाड्यांमध्ये नेहमीपेक्षा जास्त गर्दी होण्याची शक्यता मध्य रेल्वेने वर्तवली आहे.