RailEnquiry

'ओव्हल मैदान ते विरार'ला रेल्वे मंत्रालयाचा आधार
३ हजार कोटी रुपयांचे अर्थसहाय्य देणार

ओव्हल मैदान ते विरार या एलिव्हेटेड प्रकल्पापुढील आर्थिक अडचणी सोडवण्यासाठी रेल्वेने पुढाकार घेतला असून सुमारे २३ हजार कोटी रुपयांच्या या महत्त्वाकांक्षी प्रकल्पासाठी रेल्वे मंत्रालयाने १० टक्के म्हणजे, तब्बल ३ हजार कोटी रुपयांचे अर्थसहाय्य उभे करण्याचा निर्णय घेतला आहे. त्यामुळे, हा प्रकल्प उभारण्यासाठी पुढे येणाऱ्या कंपन्यांपुढील आर्थिक अडचण दूर होण्यास मदत होणार आहे.

मुंबईतील उपनगरी लोकल मार्गाच्या विस्तारात जमिनीची प्रचंड कमतरता जाणवत आहे. त्यामुळे पश्चिम रेल्वेच्या सध्याच्या जाळ्यावर एलिव्हेटेड प्रकल्प राबवण्याची योजना आखण्यात आली. केंद्र सरकार आणि नियोजन आयोग या प्रकल्पाविषयी आग्रहाची भूमिका घेत असले तरी राज्यातील काही बड्या अधिकाऱ्यांकडून त्यात नकारात्मक भूमिका घेण्यात येत आहे. अशावेळी प्रचंड आर्थिक गुंतवणूक आवश्यक असलेल्या या प्रकल्पात सहभागी होणाऱ्या कंपनीपुढे कर्ज उभारणीचे अडथळे येण्याची शक्यता होती. ती दूर करण्यासाठीच रेल्वेने १० टक्के अर्थसहाय देण्याचा निर्णय घेतला आहे. रेल्वेकडून रोखे स्वरुपात सुमारे ३ हजार कोटी रुपयांची रक्कम उभारून संबंधित कंपनीस देण्यात येईल. त्याचवेळी, या प्रकल्पात स्वारस्य दाखवणाऱ्या कंपन्यांसाठी मुदतवाढ देण्याचाही निर्णय रेल्वेने घेतला आहे.