Title - ટ્રેનોનું ચેઈન પુલિંગ કરી દારૂ ઉતારવાનું સુવ્યવસ્થિત નેટવર્ક

સુરત, તા.૧૬

વિવિધ ટ્રેનોમાં સુરત અને ઉધના રેલવે સ્ટેશનની આસપાસ ચેઈન પુલિંગ કરી શહેરમાં દારૂ ઘૂસાડવામાં આવતો હોવાની વ્યાપક ફરિયાદને આધારે આજે આરપીએફએ ટ્રેનનું ચેઈન પુલિંગ કરી દારૂ ઉતારતા એક શખ્સને દારૂના જથ્થા સાથે ઝડપી પાડી કાયદેસરની કાર્યવાહી કરી છે.

    ટ્રેનનું ચેઈન પુલિંગ કરી દારૂ ઉતારતો શખ્સ ઝડપાયો

આ અંગે મળતી જાણકારી મુજબ છેલ્લા કેટલાય સમયથી વિવિધ ટ્રેનોનું સહારા દરવાજા પાસે ચેંઇન પુલિંગ કરવાના બનાવોમાં સતત વધારો થતો હોવાની વ્યાપક ફરિયાદ આરપીએફને મળી રહી હતી. જે આધારે આરપીએફ પીઆઇ ગ્રેસિયસ ફર્નાન્ડીઝની સૂચનાના આધારે કોન્સટેબલ વનરાજ અને જગમલે સહારા દરવાજા વિસ્તારમાં વોચ રાખીને બેઠા હતા. દરમિયાનમાં સહારા દરવાજા પાસે જમ્મુતાવી એકસપ્રેસનું ચેઈન પુલિંગ કરીને એક શખ્સ ભાગતો હતો. જેને આરપીએફએ ફિલ્મીઢબે પીછો કરી દારૂ ઉતારતા શખ્સ સુજીતકુમાર એસ. મોર્ય (રહે. ૯૨-કિશોર ભવાની સોસાયટી, ગોડાદરા) ની ધરપકડ કરી તેની પાસે રહેલ દારૂના ૯૨ જેટલાં કવાર્ટર સાથે ઝડપી પાડી કાયદેસરની કાર્યવાહી હાથ ધરી હતી. જેમાં આરપીએફએ ચેઈન પુલિંગ કરવાનો કેસ કર્યો હતો, જ્યારે દારૂ લાવવા બદલ શખ્સને રેલવે પોલીસને હવાલે કર્યો હોવાની વિગતો જાણવા મળી છે.
અત્રે ઉલ્લેખનીય છે કે, શહેરમાં વિવિધ ટ્રેન મારફતે દારૂ લાવવા માટે કેટલાંક શખ્સો સવારે ફલાઇંગ રાણી દ્વારા દમણ જતાં હોય છે. તેઓ ત્યાંથી દારૂનો જથ્થો લઇ સુરત મોટાભાગે જમ્મુતાવી, ફિરોજપુર જનતા અથવા તો વિરાર શટલ દ્વારા આવતાં હોય છે. જેના કારણે આ ત્રણેય ટ્રેનોમાં ચેઈન પુલિંગના બનાવોમાં સતત વધારો થતો હોય છે. કારણ કે ચેઈન પુલિંગ ઉધના અથવા તો સુરત રેલવે સ્ટેશન પાસે કરીને પોલીસની નજરથી બચીને ભાગી જતાં હોય છે. આવા તત્ત્વો સામે આરપીએફએ કાર્યવાહી કરતાં દમણથી દારૂ લાવનારા તત્ત્વોમાં ફફડાટ વ્યાપી જવા પામ્યો છે.