Title - ३२ स्टेशनांवर सरकते जिने

पश्चिम रेल्वेची सुविधा ; मेपर्यंत दादर , पार्ले , अंधेरी , बोरीवलीत सोय

म. टा. प्रतिनिधी , मुंबई

पश्चिम रेल्वेवरील प्लॅटफॉर्म आणि पुलांवरील वाढत्या गर्दीवर उपाय योजण्यासाठी रेल्वेने तब्बल ३२ स्टेशनांवर सरकते जिने उभारण्याचा निर्णय घेतला आहे. त्यापैकी पहिल्या टप्प्यात मे महिन्यापर्यंत दादर , विलेपार्ले , अंधेरी , बोरीवली या स्टेशनांवर सरकते जिने सुरू होणार आहेत. त्यानंतर टप्प्याटप्प्यात इतर स्टेशनांवरही सरकते जिने बसवले जाणार आहेत.

दहिसर , बोरिवली , कांदिवली , मालाडच्या प्रवाशांनी पश्चिम रेल्वेचे महाव्यवस्थापक महेश कुमार यांच्याशी बोरीवली स्टेशनवर बुधवारी संवाद साधला. खासदार संजय निरुपम यांनी राबवलेल्या या उपक्रमावेळी भाजप आमदार गोपाळ शेट्टी , मुंबई रेल्वे प्रवासी संघाचे कैलास वर्मा , मुंबई उपनगर रेल्वे पॅसेंजर्स असो.चे सदस्य प्रकाश लोलेकर आदी उपस्थित होते. या वेळी प्रवाशांनी विविध मागण्यांची जंत्री दिली. त्यात प्रामुख्याने या सर्व स्टेशनविषयी प्रशासनाकडून विशेष योजना राबवल्या जात नसल्याची तक्रार करण्यात आली. त्याशिवाय दैनंदिन प्रवासातील अडचणींची माहिती देण्यात आली.

प्रवाशांना काय हवे ?

* महिलांसाठी फर्स्ट क्लासचा स्वतंत्र डबा
* दहिसर , बोरिवली , कांदिवली , मालाड स्टेशनवर प्रसाधनगृहांची व्यवस्था
* मुंबई सेंट्रलप्रमाणेच बोरीवलीत मेल-एक्स्प्रेस गाड्यांच्या आरक्षणाचे इलेक्ट्रॉनिक डिस्प्ले
* प्लॅटफॉर्मवरील स्टॉल हटवा
* फेरीवाल्यांवर कारवाई
* दहिसरला प्लॅटफॉर्म क्रमांक एकच्या उत्तरेस तिकीट खिडकी
* लांब पल्ल्याच्या गाड्यांचे आरक्षण केंद्र