Title - स्पेनमधील रेल्वे अपघात अतिवेगामुळे

सॅंतिआगो डी कॅंपोस्तेला - उत्तर स्पेनमधील सॅंतिआगो डी कॅंपोस्तेला शहरामध्ये झालेला भीषण अपघात हा अतिवेगामुळे झाला असल्याचे वृत्त आज (शुक्रवार) सूत्रांनी दिले. युरोपमधील सर्वांत भीषण रेल्वे अपघातांपैकी एक मानल्या जाणाऱ्या या अपघातामध्ये 80 जण ठार तर शेकडो जण जखमी झाले आहेत. या रेल्वेच्या वाहकास(ड्रायव्हर) पोलिसांनी इस्पितळामधून चौकशीसाठी ताब्यात घेतले आहे.

आठ डबे असलेली ही रेल्वे प्रचंड वेगात असताना एका वळणावर अचानक रुळावरू न घसरून भिंतीला धडकली होती. यानंतर रेल्वेच्या डब्यांमध्ये आगही लागली असल्याचे सूत्रांनी सांगितले होते. उत्तर स्पेनमधील गॅलिशिआ प्रांताची राजधानी असलेल्या सॅंतिआगो डी कोंपोस्तेला शहरामध्ये आता या प्रकरणाची चौकशी चालू झाली असून शहरावर दु:खाची छाया पसरली आहे. येथील स्थानिकांनी मदतकार्यात सहभाग घेताल्याची माहितीही सूत्रांनी दिली आहे.

येशु ख्रिस्ताचे शिष्य असलेल्या सेंट जेम्स यांच्या स्मरणार्थ या पुरातन शहरात साजरा केल्या जाणाऱ्या उत्सवाच्या पार्श्‍वभूमीवर हा दुदैवी अपघात घडला आहे. हा उत्सव युरोपमधील ख्रिश्चन धर्मीयांच्या महत्त्वाच्या उत्सवांपैकी एक मानला जातो  या उत्सवासाठी या शहरात हजारो ख्रिश्‍चनधर्मीय गोळा झाले आहेत. स्पेनचे पंतप्रधान मारिआनो राजोय यांनी या घटनेबद्दल तीव्र शोक व्यक्त केला आहे. माद्रिद येथून फेरोल येथे जाणारी ही रेल्वे गॅलिशिया प्रांतामधील समुद्रकिनाऱ्याजवळ अपघातग्रस्त झाली होती.