Title - रेल्वेचा संपाचा 'सिग्नल'

मुंबई

रेल्वे कर्मचाऱ्यांसाठी सातव्या वेतन आयोग समितीची स्थापना करावी , सहाव्या वेतन आयोगातील त्रुटींचे निराकरण करणे , रिक्त पदे त्वरित भरणे आदी मागण्यांच्या पूर्ततेसाठी ' नॅशनल फेडरेशन ऑफ इंडियन रेल्वेमेन ' ने (एनएफआयआर) संपाची तयारी चालवली आहे. रेल्वे कर्मचाऱ्यांच्या मागण्यांसाठी ' एनएफआयआर ' ने आज , सोमवारी बैठक बोलावली आहे. या बैठकीत संप पुकारण्याच्या निर्णयावर चर्चा केली जाणार आहे. संपाचा निर्णय झाल्यास मतदान घेऊन कर्मचाऱ्यांचा कल जाणून घेतला जाणार आहे.

रेल्वे कर्मचाऱ्यांच्या बऱ्याच मागण्या प्रलंबित असून रेल्वे त्याकडे दुर्लक्ष करत असल्याचा ' एनएफआयआर ' चा दावा आहे. कर्मचाऱ्यांच्या मागण्या पूर्ण केल्या जात नसल्याने कर्मचाऱ्यांमध्ये असंतोष निर्माण झाला आहे. त्या स्थितीत , ' एनएफआयआर ' ने देशभरातील विविध विभागांतील प्रमुख पदाधिकाऱ्यांची बैठक सोमवारी आयोजित केली आहे. या बैठकीत २० प्रमुख पदाधिकारी सहभागी होणार आहेत.

त्यात ' एनएफआयआर ' चे सरचिटणीस एम. राघवय्या , ' वेस्टर्न रेल्वे मजदूर संघा ' चे (डब्ल्यूआरएमएस) सरचिटणीस जगन्नाथ माहुरकर आदी ज्येष्ठ नेत्यांचा सहभाग आहे. या बैठकीत संप पुकारण्याबाबत निर्णय घेण्यात घेण्यात येईल. त्याप्रकारे संपाचा निर्णय घेतल्यास ' एनएफआयआर ' शी निगडित देशभरातील संघटनांतील कर्मचाऱ्यांचे मत गुप्त मतदानाने जाणून घेण्यात येईल. त्यात रेल्वे संपाविषयी बहुमत लक्षात घेऊन त्यावर शिक्कामोर्तब करण्यात येईल. याप्रकारे संप पुकारला गेल्यास रेल्वे सेवा मोठ्या प्रमाणात विस्कळीत होऊ शकते. भारतीय रेल्वेने झोपेचे सोंग घेतले असल्याने हा पर्याय विचारात घेतला जात असल्याचे ' डब्ल्यूआरएमएस ' चे मुंबई विभागीय सचिव अजय सिंग यांनी सांगितले.

प्रमुख मागण्या...

सातव्या वेतन आयोगाची स्थापना
सहाव्या वेतन आयोगातील त्रुटी दूर करा
नवीन पेन्शन योजना रद्द करा
रिक्त पदे भरावी
कर्मचाऱ्यांच्या कॅडरमधील विसंगती दूर करा

७४चा ' तो ' संप

यापूर्वी रेल्वे नेते जॉर्ज फर्नांडिस यांच्या नेतृत्त्वाखाली ८ मे १९७४ मध्ये देशव्यापी रेल्वे संप पुकारण्यात आला होता. हा संप तब्बल २० दिवस चालला होता.