Title - रेल्वे उड्डाणपुलाची रखडपट्टी!

पाच वर्षांपासून काम सुरूच

>> मयुरेश वाघ , वसई

चार लाख विरारकरांना पूर्व-पश्चिम ये-जा करण्यासाठी अत्यंत महत्त्वाच्या विरार येथील रेल्वे ओलांडणी पुलाचे काम गेली पाच वर्षे रखडले असून त्यामुळे अनेक विरारकरांना रोज किमान तीन किमींचा वळसा मारावा लागत आहे. राजकीय इच्छाशक्तीचा अभाव आणि प्रशासकीय दिरंगाई यामुळे रखडपट्टी झालेल्या या पुलासाठी मे महिन्याची नवीन डेडलाइन देण्यात आली आहे.

विरारच्या पूर्व आणि पश्चिमेकडे आवश्यकता नसताना कोट्यवधींचा खर्च करून स्कायवॉक उभारण्यात आले आहेत. परंतु रेल्वेच्या फाटकापाशी होणारी वाहतूक कोंडी टाळण्यासाठी या पूलाचे काम तातडीने मार्गी लावण्याचा विचार मात्र नगरपरिषदेची महानगरपालिका झाली तरी विलंबाच्याच फायलीत धूळ खात पडून आहे. ऑक्टोबर-२००६मध्ये रेल्वे फाटक बंद करण्यात आले.

२४ मे २००६ रोजी या कामाचा कार्यादेश ठेकेदाराला देण्यात आला. काम पूर्ण करण्यासाठी २४ महिन्यांची मुदत होती. मात्र , पश्चिमेला राऊतवाडी येथे तलावाच्या जागेत पिलर टाकण्यावरून प्रकरण वसई कोर्टात सुरू आहे. पूर्वेलाही एक हॉटेलचालक तसेच दुकानदारांचा विरोध होता. तरीही सध्या पूर्वेचे काम वेगाने केले जात आहे.

सिडको , पालिका आणि रेल्वे यांच्या संयुक्त खर्चातून पुलाचे काम सुरू झाले असले , तरी ते आजतागायत पूर्ण झालेले नाही. विशेष म्हणजे , रेल्वेने त्यांच्या हद्दीतील काम पूर्ण केले असून आता स्टेशनच्या पूर्व आणि पश्चिमेकडील काम अपूर्ण आहे. १२ कोटी खर्चाच्या या पुलासाठी सिडको आणि रेल्वेने प्रत्येकी तीन कोटी खर्च केले. उर्वरीत तीन कोटी पालिकेने एमएमआरडीएकडून आलेल्या अनुदानातून दिले. तर उर्वरीत तीन कोटींचा भार उचलण्याची तयारी पालिकेने दाखवली आहे. रेल्वे व्यक्तिरिक्त सार्वजनिक बांधकाम विभाग पुलाचे काम करत आहे. १५ टक्के काम शिल्लक असल्याचे अधिकाऱ्यांचे म्हणणे आहे. (क्रमशः)

* खर्च दोन कोटींनी वाढला
कामाला विलंब झाल्याने प्रकल्पावरील खर्चात दोन कोटींची भर पडली असून आता हा खर्च १४ कोटींच्या घरात गेला आहे.

* मेपर्यंत काम होणार ?
नगरपरिषदेने जमिनीच्या अडचणी सोडवल्या नाहीत म्हणून काम रखडल्याचे अधिकाऱ्यांचे म्हणणे आहे. २००८नंतर मार्च २०१२ची डेडलाइन दिली. आता ती वाढवून मे-२०१३ करण्यात आली आहे. आता या ब्रीजचे काम १० ते १५ टक्के बाकी राहिले असून ३१ मार्च २०१३ पर्यंत ठेकेदाराला मुदतवाढ देण्यात आली आहे. मार्च नाही तर किमान मेपर्यंत कोणत्याही परिस्थितीत ब्रीजचे काम पूर्ण होईल , असा दावा सार्वजनिक बांधकाम विभागाच्या अधिकाऱ्याने केला. पश्चिमेकडील जागेबाबत जमीन मालकासमवेत चर्चा करून काम वेळेत पूर्ण करण्याचा प्रयत्न करू , असे सभापती सुदेश चौधरी यांनी सांगितले.