Title - बेलापूर येथे सबवेची मागणी

गेली अनेक वर्षांपासून आयकर कॉलनीतील नागरिकांना बेलापूर येथे जाण्यासाठी रेल्वेरुळ ओलांडून जावे लागत आहे. हा जीवघेणा प्रकार आता थांबवणार असून सुरक्षितपणे मार्ग ओलांडता यावा यासाठी येथे पालिका सिडको आणि रेल्वे प्रशासनाच्या निर्णयामुळे लवकरच सबवे बांधला जाणार आहे. आयकर कॉलनी मधून बेलापूर येथे जाण्यासाठी नागरिकांना रेल्वे रुळ ओलांडून जावे लागते. यामुळे नागरिकांना जीव मुठीत घेऊन रूळ ओलांडावा लागत आहे.

अनेकदा येथे छोट्या मोठ्या अपघातांच्या घटना देखील घडल्या आहेत. त्यामुळे नागरिकांकडून या ठिकाणी पालिका प्रशासनाद्वारे सबवे बांधावा , अशी मागणी वारंवार होत होती. जर सबवे बांधला गेला तर भविष्यातील अपघात होणार नाहीत. सिडको , महानगरपालिका आणि रेल्वे अधिकार्यांच्या संयुक्त बैठकीत या ठिकाणी सबवे बांधण्यावरती एकमत झाले आहे. या कामाचा रेल्वे प्रशासनाकडे पाठपुरावा केला असता रेल्वेने सबवे बांधण्याबाबत तयारी दर्शविली आहे. परंतु त्यावर होणारा खर्च महापालिकेस करावा लागणार आहे. रेल्वेने महापालिकेस प्लानिंग अॅन्ड एस्टीमेट चार्जेस पोटी ३० लाखाची रक्कम अदा करण्यास सांगितले असून हा प्रस्ताव महापालिकेच्या सर्वसाधारण सभेने मंजूर केला आहे.