Title - नागपूर - मुंबई रेल्वे वाहतूक ठप्प, अनेक गाड्या रद्द

नागपूर

विदर्भात मुसळधार पावसामुळे जनजीवन विस्कळीत झालं असून रेल्वेलाही मोठा फटका बसला आहे. नागपूरजवळ पावसाच्या पाण्यामुळे रेल्वे रूळाखालील माती वाहून गेल्याने मुंबईसह दक्षिणेकडे जाणारी वाहतूक ठप्प झाली आहे. यामुळे रेल्वेने काही एक्स्प्रेस गाड्या रद्द केल्या आहेत. तर काही गाड्या पर्यायी मार्गाने वळविण्यात आल्या आहेत.

नागपूर - वर्धा मार्गावर सिंदी आणि तुळजापूर-दहेगाव रेल्वे स्थानकांदरम्यान रूळाखालची माती वाहून गेली आहे. त्यामुळे या मार्गावरची रेल्वे वाहतूक थांबवण्यात आली आहे. यामुळे मध्य रेल्वेने काही गाड्या रद्द केल्या आहेत. तर काही गाड्या पर्यायी मार्गाने वळवल्या आल्याचे मध्य रेल्वेच्या सूत्रांनी सांगितले. नवी दिल्ली-चेन्नई मार्गावरील गाड्या इटारसी-खंडवा-भुसावळ मार्गे वळविण्यात आल्या आहेत. तर नागपूरहून सुटणाऱ्या ११ गाड्या रद्द केल्या आहेत.

रद्द केलेल्या गाड्या नागपूर - मुंबई दुरांतो एक्स्प्रेस नागपूर - मुंबई सेवाग्राम एक्स्प्रेस अमरावती-नागपूर इंटरसिटी एक्स्प्रेस तसेच पॅसेंजर पुणे - नागपूर एक्स्प्रेस

मुंबईहून नागपूरला जाणाऱ्या खालील गाड्या रद्द मुंबई - नागपूर सेवाग्राम एक्स्प्रेस मुंबई - नांदेड व्हाया नागपूर नंदीग्राम एक्स्प्रेस मुंबई - नागपूर दुरांते एक्स्प्रेस