Title - गोंदिया-चंद्रपूर रेल्वेमार्ग विस्कळीत-

गोंदिया

गोंदियावरून चांदाफोर्टला जाणाऱ्या लोकलला रविवारी रात्री ९.५०दरम्यान वडसाजवळ अपघात झाला. यात गाडीचे तब्बल नऊ डबे रुळावरून खाली घसरले. त्यामुळे गोंदिया-चंद्रपूर हा मार्ग विस्कळीत झाला आहे. दुरुस्तीचे काम युद्ध पातळीवर सुरू असून मंगळवारी सायंकाळपासून हा मार्ग वाहतुकीसाठी पूर्ववत होण्याची शक्यता रेल्वे प्रशासनाने वर्तविली आहे.

या रेल्वे अपघातात कुठलीही जीवितहानी झाली नाही. रेल्वे रुळ तुटल्यामुळे हा अपघात झाल्याचा प्राथमिक अंदाज वर्तविला जात आहे. सोमवारी गोंदिया स्थानकावरून सुटणाऱ्या तब्बल चार गाड्या रद्द करण्यात आल्या आहेत. त्यामुळे या मार्गावरील प्रवाशांचे हाल झाले. मार्ग सुरळीत करण्याचे काम युद्ध पातळीवर सुरू आहेत. मंगळवारी सायंकाळपासून हा मार्ग पूर्ववत सुरू होण्याची शक्यता रेल्वे अधिकाऱ्यांनी वर्तविली आहे.

रद्द झालेल्या गाड्या १) ५८८०२-- गोंदिया--बल्लारशहा पॅसेंजर....वेळ--सकाळी ७.३० २) ७८८२०-- गोंदिया--बल्लारशहा डेमू ट्रेन... वेळ--सकाळी १०.२० ३) ५८८०४-- गोंदिया--चांदाफोर्ट पॅसेंजर......वेळ-संध्याकाळी ५ ४) ५८८०६-- गोंदिया--वडसा पॅसेंजर...... वेळ--रात्री ७