RailEnquiry

मुंबई - पश्‍चिम रेल्वेमार्गावर शनिवारी रात्री 11.50 ते रविवारी पहाटे 4 वाजेपर्यंत आणि रविवारी (ता. 5) सकाळी 11 ते सायंकाळी 4 या वेळेत मध्य रेल्वेमार्गावर रेल्वेच्या वतीने मेगा ब्लॉक घेण्यात येणार आहे, असे रेल्वेच्या वतीने सांगण्यात आले.

ठाणे आणि कल्याणदरम्यान धीम्या मार्गावर हा ब्लॉक आहे. त्यामुळे सकाळी 10.35 ते सायंकाळी 3.49 या वेळेत डाऊन स्लो आणि सेमी फास्ट गाड्या मुलुंड व ठाण्यापर्यंत डाऊन जलद मार्गावरून चालविल्या जाणार आहेत. त्यामुळे त्या कळवा, मुंब्रा, दिवा, कोपर, ठाकुर्ली या स्थानकांवर थांबणार नाहीत. त्यामुळे येथील प्रवाशांना डोंबिवली व कल्याणपर्यंत त्याच तिकीट व पासावर प्रवास करण्याची मुभा देण्यात आली आहे.

हार्बर मार्गावर कुर्ला-सीएसटीदरम्यान अप मार्गावर आणि वडाळा रोड-माहीमदरम्यान दोन्ही मार्गांवर मेगा ब्लॉक घेण्यात येणार आहे. त्यामुळे सीएसटी-वांद्रे-अंधेरीदरम्यानची वाहतूक या काळात बंद राहील. पनवेल-सीएसटी मार्गावरील अप लोकल सकाळी 10.43 ते सायंकाळी 3.38 या वेळेत कुर्ला स्थानकातून मध्य रेल्वेच्या मुख्य मार्गावरून धावतील. त्यामुळे त्या करी रोड व चिंचपोकळी या स्थानकांवर थांबणार नाहीत. सीएसटी-अंधेरी हार्बर मार्गावरील प्रवाशांना सकाळी 10 ते सायंकाळी 6 या वेळेत दादर स्थानकातून पश्‍चिम रेल्वेमार्गावर प्रवास करण्याची सवलत देण्यात आली आहे, अशी माहिती मध्य रेल्वेच्या वतीने देण्यात आली.

पश्‍चिम रेल्वेचा शनिवारी नाईट ब्लॉक आहे. या मार्गावर वसई व भाईंदरदरम्यान जलद मार्गावर शनिवारी रात्री 11.50 ते पहाटे 4 वाजेपर्यंत (रविवारी) ब्लॉक घेण्यात येणार आहे. मात्र, रविवारी पश्‍चिम रेल्वेवर ब्लॉक घेतला जाणार नसल्याने प्रवाशांना दिलासा मिळाला आहे.

शिवडीतील फाटक बंद

हार्बर रेल्वेमार्गावरील शिवडी येथील रेल्वे फाटकदुरुस्तीच्या कामासाठी रविवारी वाहतुकीसाठी बंद ठेवण्यात येणार आहे. सकाळी 9 ते रात्री 8 वाजेपर्यंत हे फाटक बंद राहील, असे मध्य रेल्वेच्या वतीने सांगण्यात आले.