Title - सोलापूर रेल्वे स्थानकाच्या मास्टर प्लॅनला मिळाली मंजुरी

सोलापूर - रेल्वे स्थानकमधील आरक्षण केंद्रासमोर तिकीट काढण्यासाठी होत असलेल्या रांगा, वाहने आत आणताना प्रवाशांची होणारी दमछाक, तिकिटासाठी होणारी हुज्जत असे प्रकार सोलापूर रेल्वे स्थानकात सध्या घडत असले तरी भविष्यात मात्र असे चित्र दिसणार नाही. कारण, सोलापूर रेल्वे विभागाने सोलापूरकरांची भविष्यातील गरज ओळखून पुढील वीस वर्षांचा आराखडा तयार केला आहे. सोलापूर रेल्वे विभाग व्यवस्थापक ए. के. प्रसाद यांनी त्यास नुकतीच मंजुरी दिली आहे.

अंतिम मंजुरीसाठी मध्य रेल्वेचे सरव्यवस्थापक सुबोध जैन यांच्याकडे पाठवणार आहे. नुकताच सोलापूर रेल्वे स्थानकाला रेल्वे मंत्रालयाकडून ‘ए वन’ दर्जा मिळाला आहे. हा दर्जा मिळण्यापूर्वीच सोलापूर रेल्वे प्रशासनाने 20 वर्षांतील सोलापूर रेल्वे स्थानक हे उद्दिष्ट डोळ्यांसमोर ठेवून कामास सुरुवात केली आहे. प्रवाशांच्या दृष्टीने करण्यात येणारे बदल हे अतिशय महत्त्वाचे असून लागणार्‍या निधीसाठी रेल्वे प्रशासनाचे प्रयत्न सुरू आहेत. अंतिम मंजुरी मिळताच सोलापूर रेल्वे स्थानकाचा चेहरा-मोहरा बदलणार आहेच, शिवाय प्रवाशांच्या सोयी-सुविधेतही मोठय़ा प्रमाणात वाढ होणार आहे.

काय असतील हे बदल

चालू तिकीट खिडक्यांची संख्या दहा आहे ती 15 होणार आहे.

मालधक्याच्या उर्वरित जागेत चारचाकी वाहनतळ उभारले जाईल. त्यामुळे वाहनांची गर्दी कमी होईल.

याच जागेत पहिल्यांदाच प्रवाशांसाठी लगेज रूम व क्लॉक रूम बांधण्यात येणार आहे. त्यामुळे परगावच्या प्रवाशांची चांगली सोय होणार.

पार्सल ऑफिसच्या ठिकाणी रेल्वे पोलिस दलासाठी अद्ययावत चौकी बांधण्यात येणार आहे. येथेच रेल्वे पोलिसांचे नियंत्रण कक्ष असणार आहे.

रेल्वे पोलिस चौकीच्या जागेत नव्याने शौचालय बांधण्यात येणार आहे.

आरक्षण केंद्राच्या जागेवर सायबर कॅफे अथवा के टरिंग किचन होईल.

चौकातील मालधक्यांच्या 30 हजार चौरस मीटर जागेवर नव्याने आरक्षण केंद्र बांधण्यात येणार. तेथे 15 तिकीट खिडक्या असतील. त्यामुळे 15 ते 20 मिनिटांत आरक्षित तिकीट मिळेल.

स्थानकावर सर्वसामान्य प्रवाशांसाठी सामान्य दर्जाचे विर्शांती कक्ष उभारण्यात येणार आहे. यामुळे नंतर प्रवाशांची सोय होईल.

सोलापूरकरांची भविष्यातील गरज पूर्ण करण्यासाठी सोलापूर रेल्वे विभागाने हा प्रस्ताव तयार केला आहे. तो मंजूर झाल्यानंतर सोलापूरकरांच्या अनेक गरजा पूर्ण होणार आहेत.’’
सुशील गायकवाड, वरिष्ठ विभागीय वाणिज्य व्यवस्थापक