Title - शूटिंग एक्स्प्रेस सुपरफास्ट

मुंबई

सर्वसामान्यांच्या वाहतुकीचे महत्त्वाचे साधन असलेल्या रेल्वेने हिंदी सिनेमांच्या चि‌त्रिकरणाचा ' स्पॉट ' म्हणूनही आपली चांगलीच जागा निर्माण केली आहे. एप्रिल ते जून २०१३ या अवघ्या तीन महिन्यांच्या कालावधीत रेल्वेगाड्या , प्लॅटफॉर्म आदी ठिकाणी झालेल्या शूटिंगमधून सुमारे ९१ लाख रुपयांचा महसूल मध्य रेल्वेच्या खात्यात जमा झाला असून तीनच महिन्यांच्या कालावधीत फक्त शूटिंगमधून एवढा महसूल मिळण्याची ही पहिलीच वेळ असल्याचे सांगितले जाते. त्यामुळे मध्य रेल्वेची शूटिंग एक्स्प्रेस सुपरफास्ट असल्याचे स्पष्ट झाले आहे.

गेल्या संपूर्ण आर्थिक वर्षात शूटिंगमधून १ कोटी ५ लाख रुपयांचा महसूल मिळाला होता. पण यंदा तिमाहीतच महसुलाने एक कोटीची मजल मारली आहे. त्यात सर्वाधिक महसूल ' गुंडे ' चित्रपटाने मिळवून दिला. दोन्ही वर्षांत मिळून ' गुंडे ' तून ८० लाखांचा महसूल मिळाला. गेल्या वर्षी ' शूटआऊट अॅट वडाला ', ' हिम्मतवाला ', ' द लंच बॉक्स ' अशा काही चित्रपटांचे शूटिंग रेल्वेच्या हद्दीत झाले होते.

शूटिंग स्टेशन्स

सीएसटी स्टेशनात उपनगरीय प्लॅटफॉर्मसह मेल/एक्स्प्रेस टर्मिनसवर सर्वाधिक शूटिंग होते. त्याशिवाय , आपटा , देवळाली , वाडीबंदर यार्ड , चिखली , कामण , सातारा आदी ठिकाणीही शूटिंग होत असल्याचे मध्य रेल्वेचे मुख्य जनसंपर्क अधिकारी अतुल राणे यांनी सांगितले.

उद्घोषणा , जाहिरातींतूनही कमाई

उपनगरीय मार्गावर उद्घोषणा यंत्रणेतूनही मध्य रेल्वेच्या महसुलात भर पडत आहे. उद्घोषणेसाठी प्रति मिनिट १० हजार रु. दराने शुल्क आकारले जातात. ' केबीसी ', ' एक था टायगर ' सारख्या चित्रपटांच्या जाहिराती उद्घोषणेतून करण्यात आल्या होत्या. त्याशिवाय , एका संपूर्ण लोकलवर जाहिरात केल्यास दीड महिन्यांसाठी साडेतीन लाख रु. मिळतात.