Title - मेल-एक्स्प्रेसना ठाण्यात एकच थांबा

ठाणे स्टेशनातील प्लॅटफॉर्म क्रमांक ५ आणि सहाची लांबी वाढवल्याने लांब पल्ल्याच्या गाड्यांना आता दोन वेळा थांबे देण्याची गरज उरलेली नाही. १६ डब्यांपुढील सर्व गाड्यांना आता ठाण्यात एकच थांबा मिळत आहे.

दादर व सीएसटी येथून सुटणाऱ्या लांब पल्ल्याच्या अप गाड्या प्लॅटफॉर्म क्रमांक ६ आणि डाऊन गाड्या प्लॅटफॉर्म क्रमांक ५ वर येतात. या दोन्ही प्लॅटफॉर्मची लांबी जेमतेम १६ डब्यांची गाडी उबी राहील इतपत होती. त्यामुळे १६ डब्यांपुढील कोणत्याही गाडीला ठाणे स्टेशनात दोनवेळा थांबा द्यावा लागत होता. त्याचा परिणाम गाड्यांच्या वेळापत्रकावर होत होता. त्यामुळे लांब पल्ल्याच्या गाड्यांना ठाण्यात थांबा देण्याबाबत मध्य रेल्वेचे अधिकारी फारसे सकारात्मक नव्हते. आता मात्र मध्य रेल्वेने प्लॅटफॉर्म क्रमांक ५ व ६ची लांबी वाढवल्याने १७ , १९ , २१ व २४ डब्यांच्या गाड्या या स्टेशनात उभ्या राहू शकत असल्याची माहिती मध्य रेल्वेचे मुख्य जनसंपर्क अधिकारी अतुल राणे यांनी दिली. प्लॅटफॉर्मची लांबी वाढल्याने दादर व सीएसटी येथून सुटणाऱ्या सर्व लांब पल्ल्याच्या गाड्यांना आता ठाण्यात थांबा द्यावा , अशी मागणी खासदार आनंद परांजपे यांनी केली आहे.

उंचीही वाढणार..

ठाण्यात प्लॅटफॉर्मची उंची कमी असल्याने लोकलमधून उतरताना उडी मारावी लागते. ज्येष्ठ नागरिक व महिलांना याचा खूप त्रास होतो. त्यामुळे टप्याटप्याने प्लॅटफॉर्म क्रमांक २ , ५ व ६ तसेच ३ व ४ची उंची वाढवली जाणार असल्याचे सांगण्यात आले. याखेरीज सॅटीसचा स्कायवॉक व फूट ओव्हर ब्रीज जोडण्याचे काम अंतिम टप्प्यात आले असून , काही दिवसांतच तो खुला होईल , असे सूत्रांनी सांगितले.