Title - मनमाड रेल्वे पुलासाठी मेगाब्लॉक

मनमाड
मनमाड रेल्वे स्थानकावर चार वर्षांपासून अर्धवट असलेल्या पादचारी पुलाचे काम पूर्ण करण्यासाठी रेल्वे प्रशासनातर्फे मंगळवारी मेगाब्लॉक घेण्यात आला. त्याचबरोबर ११ , १३ व १५ जुलै रोजी मेगाब्लॉक देण्यात आले. या मेगाब्लॉकमुळे राजेंद्र नगर एक्स्प्रेस , गोदान एक्स्प्रेस , गितांजली एक्स्प्रेस या गाड्यांना पानेवाडी , समिट , आदी रेल्वे स्टेशनवर अर्धा तास थांबविण्यात येणार आहे.
मेगाब्लॉक मिळाल्यानंतर मंगळवारी पार्सल ऑफिस प्लॅटफॉर्म ते प्लॅटफॉर्म क्रमांक१पर्यंत पुलाचे गर्डर टाकण्यात आले. मध्य रेल्वेत मनमाडचे रेल्वे स्टेशन महत्त्वाचे जंक्शन मानले जाते. येथून रोज सुमारे १००पेक्षा जास्त रेल्वे गाड्यांची ये-जा होत असल्याने रेल्वे स्थानकावर प्रवाशांची नेहमीच वर्दळ असते. मात्र त्यांना बाहेर पडण्यासाठी एक पादचारी पूल कमी पडत होता. त्यामुळे रेल्वे प्रशासनाने समांतर रेल्वे पादचारी पूल बांधण्याचा निर्णय घेतला.
सुमारे चार वर्षांपूर्वी या पुलाचे काम सुरू झाले होते. मात्र निधीअभावी हे काम अर्धवट होते. पण आता पुलाचे काम सुरू झाले. मात्र या रेल्वे स्थानकावरून मोठ्या प्रमाणात गाड्यांची ये-जा होत असल्याने पुलाचे काम पूर्ण करण्यासाठी अडचण येत होती. त्यासाठी रेल्वे प्रशासनाकडे मेगाब्लॉकची मागणी करण्यात आली होती.