RailEnquiry

नागपूर

मेरी पाऊसेपीस अॅकेडमीच्या स्कूलबसला गुलशननगर रेल्वे क्रॉसिंगजवळ रेल्वे इंजिनने धडक दिली. नशीब बलवत्तर म्हणून यातील विद्यार्थी बालंबाल बचावले. दोन विद्यार्थी किरकोळ जखमी झाले. स्कूलबसचा बेजबाबदार चालक मात्र पळून गेला. स्कूलबसवर अनुभवी चालक नेमा, असे नियम घालून दिलेले असतानाही काही शाळा मात्र बेफिकीरपणे कामकाज चालवीत असल्याचे या घटनेतून सिद्ध झाले आहे.

रुळावरच फसली बस

मेरी पाऊसेपीस अॅकेडमी ही शाळा खैरेगाव येथे आहे. नेहमीप्रमाणे मुलांना शाळेतून घरी परत सोडण्यासाठी ही बस (एमएच-३५ : के. १०२२) निघाली. ५५ विद्यार्थी वाहून नेण्याची या बसची क्षमता आहे. त्यातील काही जणांना सोडून ही बस दुर्गानगर परिसराकडे जात होती. या मार्गावर येणाऱ्या कोराडी कळमना रेल्वे मार्गावरील गुलशननगर रेल्वे क्रॉसिंगवर ही बस आली. बसचालकाने इकडे-तिकडे न बघता बस रेल्वेरुळावर घातली. इतक्यात एक इंजिन येत असताना दिसले. त्यामुळे विद्यार्थी घाबरून ओरडले. चालकाने बस मागे घेण्याचा प्रयत्न केला. मात्र, या प्रयत्नात बसचे चाक रेल्वेरुळात फसले. त्यामुळे इंजिनची जोरदार धडक या बसला लागली. स्वाभाविकच विद्यार्थी घाबरले. अशा परिस्थितीत या चालकाने बेजबाबदारपणाचा कळस केला आणि तेथून पळ काढला. मात्र, या रेल्वे क्रॉसिंगजवळच वस्ती आहे. तेथील रहिवाशांनी या विद्यार्थ्यांना बसमधून बाहेर काढले आणि पोलिसांना या घटनेची माहिती दिली.

वैभव संजय समारकर (१३) आणि वृषभ ओमप्रकाश उकास हे दोन विद्यार्थी या अपघातात जखमी झाले. मात्र, त्यांची प्रकृती स्थिर असून काळजी करण्यासारखे काहीही नसल्याचे पोलिसांनी सांगितले.