Title - -नाहूर रेल्वे अपघाताची चौकशी सुरू

मुंबई - मध्य रेल्वेवर मुलुंड आणि नाहूर स्थानकांदरम्यान काल (ता. 19) रुळाशेजारच्या खांबावर आदळून लोकलमधील तीन प्रवासी मृत्युमुखी पडले आणि 25 जण जखमी झाले. या अपघाताला जबाबदार असलेले रेल्वे अधिकारी आणि कर्मचाऱ्यांचा शोध "जीआरपी'ने (गव्हर्नमेंट रेल्वे पोलिस) सुरू केला आहे. तेथील सिग्नल यंत्रणेच्या दुरुस्तीची आणि देखभालीची जबाबदारी असलेल्या कर्मचाऱ्यांची नावे पोलिसांनी मध्य रेल्वेच्या विभागीय रेल्वे व्यवस्थापकांकडे मागितली आहेत.

नाहूर अपघातप्रकरणी मध्य रेल्वेने हात झटकले असले, तरी कुर्ला येथील "जीआरपी'ने रेल्वे कर्मचाऱ्यांवरच ठपका ठेवला आहे. सिग्नलच्या खांबावर बसवलेल्या शिडीचे "नट-बोल्ट' ढिले झाले होते. वेळीच दुरुस्ती झाली असती तर अपघात झाला नसता. रेल्वेच्या निष्काळजीपणामुळेच तो अपघात घडल्याचे पोलिसांचे म्हणणे आहे. या निष्काळजीपणाला जबाबदार असणाऱ्या रेल्वे कर्मचाऱ्यांचा तपास पोलिसांनी सुरू केला आहे.

मुलुंड-नाहूर स्थानकांदरम्यान सिग्नल यंत्रणेच्या देखभालीची जबाबदारी असणाऱ्या कर्मचाऱ्यांची आणि अधिकाऱ्यांची माहिती देण्याची विनंती आज रेल्वेच्या विभागीय व्यवस्थापकांना पत्राद्वारे केली आहे, असे कुर्ला पोलिस ठाण्यातील वरिष्ठ निरीक्षक एस. एस. धुमाळ यांनी सांगितले.