Title - नाशिकरोड रेल्वे स्थानकाचे ‘विंडो इन्स्पेक्शन’

नाशिकरोड - भुसावळ मंडल रेल्वे प्रबंधक राकेशकुमार गुप्ता यांनी बुधवारी सकाळी घोटी ते मनमाड स्थानकादरम्यान ‘विंडो इन्स्पेक्शन’ केले. मध्य रेल्वेचे महाप्रबंधक सुबोधकुमार जैन 7 डिसेंबरला नाशिकरोड रेल्वे स्थानकाची तपासणी करणार असल्याने स्थानकावर अर्धा तास कसून तपासणी करण्यात आली.

तिकीट कार्यालयाबाहेरील विक्रेत्यांना मंगळवारीच हटवण्यात आले होते. मात्र, तेथील कचरा तेथेच असल्याने गुप्ता यांनी नाराजी व्यक्त केली. तसेच, जाहिरातदाराचा करार संपलेला असताना अर्धवट चिकटवलेले पोस्टर पाहून ते काढण्याचेही आदेश दिले. स्थानकावरील उड्डाणपुलाखालील दुकान हटवण्यात आल्यानंतर तेथील भिंतीवर रंगरंगोटी, पार्किंग परिसरात स्वच्छता व नियमांबाबत सूचना केल्या.

लोहमार्ग पोलिसांच्या वतीने जागा कमी पडत असल्याची तक्रार करण्यात आली. गुप्ता यांनी उपाहारगृह, आरक्षण, तिकीट ऑफिस खिडक्या, शौचालय, स्वच्छतागृह, आरक्षण माहिती यंत्राची पाहणी केली. संबंधित विभागाच्या अधिकार्‍यांना त्यात सुधारणा करण्याचे आदेश दिले. देवळाली कॅम्प स्थानकाच्या पाहणीदरम्यान कर्मचारी वसाहत परिसरात वाढलेले गवत व साठलेला कचरा पाहून त्यांनी तीव्र नाराजी व्यक्त करून तत्काळ स्वच्छतेचे आदेश दिले. अध्र्या तासाच्या पाहणीनंतर ते खेरवाडी स्थानकाच्या तपासणीसाठी रवाना झाले.
काय असते विंडो इन्स्पेक्शन? - महाप्रबंधकांच्या दौर्‍यापूर्वी मंडल प्रबंधक विंडो इन्स्पेक्शन करतात. यासाठी स्वतंत्र गाडी असते. बोगीला असलेल्या मोठय़ा काचेसमोर बसून प्रबंधक रेल्वे ट्रॅक, इलेक्ट्रिक, सिग्नल यांची पाहणी करतात. प्रत्येक स्थानकावर 20 ते 30 मिनिटे तपासणी करतात. या दरम्यान काही त्रुटी, समस्या आढळल्यास त्यांच्या समवेत गाडीत असलेल्या इलेक्ट्रिशियन, मेकॅनिकल, सिग्नल ऑपरेटर, इंजिनिअर, कर्मशियल आदी विभागांच्या प्रमुखांना दुरुस्तीच्या सूचना करतात.