Title - मुंबई-पुणे प्रवासासाठी आणखी एक ट्रेन

मुंबई आणि पुण्यादरम्यान आणखीन एक ट्रेन येत्या १५ दिवसांत सुरू होणार आहे.
मुंबई – मुंबई आणि पुण्यादरम्यान आणखीन एक ट्रेन येत्या १५ दिवसांत सुरू होणार आहे. ही गाडी लोकमान्य टिळक टर्मिनस, कुर्ला येथून सुटेल आणि पुणे शिवाजीनगपर्यंत चालवण्यात येईल. विशेष म्हणजे, ही गाडी ठाणे, पनवेल मार्गे कर्जत आणि तिथून पुण्याच्या दिशेने रवाना होणार आहे. तीन तासांत ही गाडी कुल्र्याहून शिवाजीनगरला पोहोचेल.
मुंबई ठाणे-पनवेल मार्गे पुणे या मार्गावर सध्या प्रगती एक्सप्रेस धावते. तिला प्रचंड प्रतिसाद मिळत आहे. या गाडीचा फायदा ठाणे, नवी मुंबई, पनवेल आणि कर्जतच्या प्रवाशांना होत आहे. त्या पार्श्वभूमीवर आणखी एक गाडी याच मार्गावर सुरू करण्याचा निर्णय रेल्वे प्रशासनाने घेतला आहे. पुण्याला जाण्यासाठी सकाळी साडेदहा ते अडीच या कालावधीत एकही गाडी नाही. त्यामुळे आता नवीन गाडी सकाळी साडे दहा वाजता लोकमान्य टिळक टर्मिनस येथून सुटेल. ती दुपारी दीड वाजता म्हणजेच तीन तासांत शिवाजीनगरला पोहोचेल आणि तिथून मुंबईला रवाना होईल. या गाडीमुळे पुणे, मुंबईतील प्रवाशांबरोबर पनवेल, कर्जत आणि नवी मुंबईच्या प्रवाशांनाही दिलासा मिळणार आहे. या वेळात मुंबई-पुणे मार्गावर गाडी सुरू करण्यात अडचणी होत्या. याच वेळेत या मार्गावर काम सुरू असते. त्यामुळे ही गाडी सुरू होण्यास विलंब होत असल्याची माहिती काही दिवसांपूर्वीच मध्य रेल्वेचे महाव्यवस्थापक सुबोधकुमार जैन यांनी दिली होती. मात्र यावर तोडगा काढून हा प्रश्न सोडवण्यात येईल आणि गाडी सुरू करण्यात येईल, असे त्यांनी दिले होते.