Title - रेल्वेचा उत्तर महाराष्ट्राला ठेंगा

नाशिक

रेल्वेमंत्री पवनकुमार बन्सल यांनी मंगळवारी मांडलेल्या रेल्वे बजेटमध्ये उत्तर महाराष्ट्राला ठेंगा दाखवला आहे . आगामी सिंहस्थाच्या दृष्टीने नाशिककरांनी केलेल्या अनेक मागण्यांना वाटाण्याच्या अक्षता लावण्यात आल्याने नाशिककरांची घोर निराशा झाली आहे .

या बजेटमध्ये ६७ नव्या एक्स्प्रेस आणि २७ नव्या पॅसेंजर ट्रेनची घोषणा करण्यात आली आहे ; परंतु यात उत्तर महाराष्ट्रासाठी काहीच नाही . नाशिककरांना पंचवटीला समांतर अशा नव्या गाडीची आवश्यकता होती . त्या संदर्भात अनेकवेळा रेल्वे मंत्रालयाकडे पाठपुरावाही करण्यात आला आहे . मा ‍‌ त्र रेल्वेमंत्र्यांनी त्याची दखलच घेतलेली नाही .

सिंहस्थाचे नियोजन नाही

आगामी सिंहस्थ कुंभमेळ्यात होणारी गर्दी लक्षात घेता आतापासूनच कामे सुरू करणे गरजेचे आहे . त्या अनुषंगाने नाशिकरोड स्टेशनवर होणारी गर्दी लक्षात घेता चौथा प्लॅटफॉर्म तितकाच महत्त्वाचा होता . त्याबाबत कोणतीही घोषणा करण्यात आलेली नाही . तसेच अलाहाबाद येथे झालेला अपघात लक्षात घेता जुन्या पुलांची दुरुस्ती होणे आवश्यक आहे . त्यासाठीही काहीच तरतूद करण्यात आलेली नाही .

नाशिक - पुणे मार्गाचे काय ?

नाशिक - पुणे मार्ग व्हावा ही गेल्या अनेक वर्षांची मागणी आहे . त्यासंबंधी काहीच निर्णय झालेला नाही . त्यामुळे सध्या जुन्या पनवेल मार्गावरूनच गाड्या धावणार आहेत . नाशिक - पुणे मार्गाबाबत निर्णय झाला असता तर वेळेची बचत झाली असती .

नीर प्रकल्प पाण्यात

रेल्वेचा नीर प्रकल्प नाशिकला येणार होता , त्याबाबतही बजेटमध्ये काहीच उल्लेख करण्यात आलेला नाही . माजी मंत्री ममता बॅनर्जी यांनी देशात सहा ठिकाणी शुद्ध पेयजल प्रकल्प सुरू करण्याची घोषणा दोन वर्षांपूर्वी केली होती . त्यातील एक प्रकल्प नाशिकला होणार होता . त्यासाठी सहा महिन्यांपूर्वीच आयआरसीटीसीने जागेची पाहणी केली होती . त्यामुळे या प्रकल्पाबाबत या बजेटमधून काही निर्णय होणे अपेक्ष ‌ ित होते . नाशिककरांची ही अपेक्षाही फोल ठरली आहे .