Title - पुण्यातील मेट्रो स्वारगेटपर्यंतच!

पुणे

पिंपरी-चिंचवड ते स्वारगेट हा मार्ग कात्रजपर्यंत वाढण्याचा निर्णय पुणे महापालिकेने घेतला असला , तरी डिटेल प्रोजेक्ट रिपोर्टमध्ये (डीपीआर) या मार्गाचा समावेश नसल्याने नवी दिल्लीमध्ये झालेल्या चर्चेत या बदलाचा विचारही करण्यात आला नाही. त्यामुळे स्वारगेट ते कात्रज या वाढीव मार्गाला ' रेड सिग्नल ' लागला आहे.

मेट्रोच्या पिंपरी-चिंचवड ते स्वारगेट या मार्गाला मान्यता देताना पुणे महापालिकेच्या स्थायी समिती आणि सर्वसाधारण सभेने कात्रजपर्यंत हा मार्ग वाढण्याचा निर्णय घेतला आहे. कात्रजपर्यंत वाढवलेल्या मार्गाबाबत महापालिका आयुक्त महेश पाठक यांच्याकडे विचारणा करण्यात आली असता , याबाबत सध्या काही विचार नसल्याचे त्यांनी स्पष्ट केले. त्यामुळे पिंपरी-चिंचवड ते स्वारगेट हा मार्ग कात्रजपर्यंत होण्याची शक्यता सध्या मावळली आहे.

मेट्रोचा बोजा

पुणे आणि पिंपरी-चिंचवड या दोन्ही महापालिकांनी प्रत्येकी पाच टक्के खर्च करण्याचे ठरले होते. मात्र , पिंपरी-चिंचवड महापालिकेच्या हद्दीतील फ्लायओव्हर आणि ग्रेड सेपरेटर यांमुळे करावे लागणारे तांत्रिक बदल , तसेच कात्रजपर्यंतच्या मार्गाची पडलेली भर , यामुळे दोन्ही महापालिकांनी प्रत्येकी दहा टक्के खर्च करण्याचा निर्णय झाला आहे. त्यामुळे दोन्ही महापालिकांमधील नागरिकांवर मेट्रोचा बोजा पडणार आहे. या प्रकल्पासाठी केंद्र आणि राज्य सरकारकडून प्रत्येकी वीस टक्के वाटा उचलला जाणार असून , उर्वरित पन्नास टक्के निधी बाजारातून उभा करावा लागणार आहे.

मेट्रोच्या नियोजित खर्चामध्ये वनाझ ते रामवाडी या प्रकल्पाचा २००९ मधील खर्च एक हजार ९४८ कोटी रुपये होता. स्वारगेट ते पिंपरी-चिंचवड या मार्गाचा खर्च २००९ मध्ये सुमारे पाच हजार ९९८ कोटी रुपये होईल , असा अंदाज बांधण्यात आला होता. आता हे आकडे वाढणार आहेत.

मेट्रो मार्ग : पिंपरी-चिंचवड ते स्वारगेट

लांबी : १६.५८ किलोमीटर
स्थानके : १५. पिंपरी-चिंचवड , संत तुकारामनगर , भोसरी , कासारवाडी , फुगेवाडी , दापोडी , बोपोडी , खडकी , रेंज हिल्स , शिवाजीनगर , एएसआय , पुणे महापालिका , बुधवार पेठ , मंडई आणि स्वारगेट.
पिं. चिं. मनपा हद्दीतील मार्ग : सव्वासात किलोमीटर , त्यावर सहा स्थानके.
पुणे मनपा आणि खडकी कँटोन्मेंटच्या हद्दीतील मार्ग : ९.४४ किलोमीटर , त्यावर नऊ स्थानके.
प्रकार : पिंपरी-चिंचवडमध्ये ' एलिव्हेटेड ' मेट्रो , तर पुण्यात भुयारी आणि ' एलिव्हेटेड ' अशा दोन्ही प्रकारे मेट्रो धावणार आहे.