RailEnquiry

रविवारी, २७ मे रोजी सकाळी अकरा ते दुपारी चार वाजेपर्यंत कल्याण ते ठाणेदरम्यान मध्य रेल्वेतर्फे मेगा ब्लॉक घेण्यात आला आहे. सुट्टीचे दिवस, त्यामुळे प्रवाशांची होणारी वाढती गर्दी विचारात घेऊन रेल्वे प्रवाशांचे हाल टाळण्यासाठी कल्याण डोंबिवली पालिकेच्या परिवहन उपक्रमाने २७ मे, रविवारी कल्याण ते ठाणेदरम्यान दोन विशेष बस सोडण्याचा निर्णय घेतला आहे, अशी माहिती परिवहन समितीचे सभापती अशोक गोडबोले यांनी दिली. कल्याण पश्चिम रेल्वे स्टेशन येथून सकाळी साडेदहा व दुपारी साडेबारा वाजता या बस ठाण्याच्या दिशेने निघतील. ठाण्यात तीन हात नाका हा बसचा शेवटचा थांबा आहे. या थांब्यावरून प्रवासी घेऊन पुन्हा या बस परतीच्या वाटेवर असतील. प्रवासी तिकीट दर वीस रुपये आहे.
मेगा ब्लॉकमुळे लोकलमध्ये होणारी वाढती गर्दी, ज्येष्ठ नागरिक, वृद्ध, अपंग, लहान मुलांचा विचार करून ही बस सेवा सुरू करण्याचा निर्णय घेतला, असे सभापती गोडबोले यांनी सांगितले.